Shinampoo ko lang ‘yan (A Pacman History-making Win)

Do you know the correct way to shampoo your hair?

Kon yakakita kaw nan ayaw nan min-agi na Sabado, November 14, 2009 sa Sin City (Dominggo, November 15, 2009, sa ato) na an taytol “Firepower”, amo yadto an sakto na pag-shampoo nan buhok para mawa an kuto. An away nila ni Miguel Cotto ug Manny Pacquiao sa welterweight division nan boksing an ako buot pasabot.

Laong pa ni Pacman sa iya Head & Shoulder commercial sa radyo na wara siya mahadlok sa Cotto, an kahadlukan niya an falling hair hastan kaspa (dandruff), iapil pa kuno an kuto. May iya sab taglaong sa iya interbyu sa una na an sikreto niya pagpilde kan kuto, shampoo. Wara gayud agaw siya masayop kay nan min-agi na away nila sa ring, wara siya mahadlok magpasumbag kan Cotto. Tinuod na tag-shampoo-han da gyud niya nan damo na kinumo an opaw na o ni Cotto.

Sin-o sab agaw an dili modakan kon ikaw an sunod-sunodan pagsumbag. Amo da nan uwan na tagbubo nan Bagyo Ondoy sa Metro Manila an tagapauwan na kinumo ni Pacman sa kalaban. Gawas pa nan yaon amo da sab nan hangin ni Bagyo Pepeng an kakusogon sa sumbag ni Pacman. Dili kaw kaha modagan nan yaon?! Sigurado mokabad kaw gayod. Matulini pa kaw siguro kaysa kabayo.

Sa kuman kibale sigurado na Hall of Famer na gayod si Pacman sa boksing. Hain kaw nan yaon syete ka championship na sinturon  an imo yakuha sa syete ka division sa boksing. Kasagaran unom da gyud yaon sa history. Kuman pa kibali ya-break an record, tapos Pinoy pa gayod an yakakuha. An record ni Pacman amo ini, champion sa Flyweight (112 lbs), Super Bantamweight (122 lbs), Featherweiht (126 lbs), Super Featherweight (130 lbs), Lightweight (135 lbs), Light Welterweight (140 lbs), hastan Welterweight (145 lbs).

Sin-o or kinun-o pa kaha ma-break ini na record? Tana Filipino da sab an makakuha nan ini. Basin mada da ini ni Nonito Donaire, the Filipino Flash.