A Visit to Cagwait White Beach

An kadamoan sa tao basta gani summer adto gayod pasingod dayon sa dagat. Kadaghanan adto sa bohol, sa boracay, baguio, siargao, etc. Pero amo lagi an makakadto da sab yaon damo da na sapi kay maka-afford sa. Pero sa ini sab na mga panahon dili sa bagan sab madayaw ikadto ngadto ay maarang na tao. Kon madamo na tao, malipa sab an dagat kay an ihi lugar. Kon damo na tao, masamok kay damo nimo na kabahin sa pagkaligo. Imbes ganahan kaw garo maglulubo nan waray bantayan, dili nakaw hinuon katuyangan paglubo-lubo sa buhangin hastan pagsawom-sawon sa matin-aw na dagat.

Naman yadton min-agi na semana santa yakauli sa ako sa amo, ako gayod tagpahimuslan an panahon. Panagsa da gud kita kauli naman dili mahimo na dili makakaligo sa dagat. Pero sa ini lugar na higayon, wara ako sa Mabua maligo. Ako gayod tagplano daan na adto ako sa Cagwait White Beach tutal dili na sab amo yaon kalayo gayod biyahion gikan sa Tago. Sa una sagud malisuders ikadto kay kataruers nan inin dan, puro alibaong. Sa kuman lugar na panahon an dili dakan sementado yaon sa may Unaban hangtud sa Sumo-sumo. Wara gayud rason na dili makakadto kay dili na kadayaw maabugers an kardasa.

Yadton petsa otso nan ini na buwan, ako gayod inkadto an Cagwait White Beach. Madayawers ipasapasa ngadto sa dagat kay dili sa holiday yadto na adlaw. Waray imo kalaban sa pagkaligo. Waray mamantayay sa imo kon mag-uno kaw ngadto kay kamohay da gayud an yaligo. Basta weekdays, waray mangaliguay sa white beach; adto na yaon mapuno nan mangaliguay basta sabado hastan dominggo. Pero bisan sabado-dominggo dili amo gayud yaon kadamo na dili na kamo magsigo sa dagat. Wara pay mga turista na mga foreigners o taga-gawas sa probinsya an permi gayud mokadto. Puro mga taga-Surigao o yaon mga silingan lang na lungsod an modayo ngadto para maligo.

Pinakadabest pa kuman ikaligo ngadto kay virginers pa kadayaw an white beach. Wara pa sab mga aqua sports ngadto. Salbabida pa na gikan sa interior nan ligid an gamit mo ngadto kon maligo kaw. Wara pa iton mga kayak, banana boat, jet ski ug una pa dakan na mga gamit. Pwede sab dili kaw magplete nan cottage. Pwede igo da kaw hapla diretso sa buhangin.

Madayaw lagi yadton petsa otso na pagkadto ko. Gamayayers da ako yagasto - P35 na plete sa bus or jeep gikan sa Tandag pasingod sa Cagawait, P15 na plete sa trisikol gikan sa Tago pasingod sa Tandag, P7 na plete sa trisikol gikan sa Cagwait hi-way pasingod sa white beach; kaduhaon mo yaon, amo da an gasto ko sa plete. An bayad sa cottage P75.00 da isa na kaadlaw; isa ka litro na coke, isa kabuok na lechon manok tapos siete kabuok na puso. Amo da yaon yagasto ko ngadto, sulbad na an ako summer ligo sa dagat.

Sa P500.00 pwede na upat ka tao an mag-enjoy sa pagkaligo sa puti na buhangin na beach. Hain kaw yaon manhanap lugar? Dili mo maenjoy an Bohol, Siargao, Boracay, etc sa yaon da na budget. Pwede gani sab plete da imo gastuhon para makakaligo ngadto. Magsayo kaw lamang kadto tapos pagka-alas onse sa buntag undanag nakaw kaligo para wara nay gasto nan paniudto. Adto dakan kaw maniudto sa iyo bay.

Naman gusto ko ilaong sa mga Surigaonons na ato i-enjoy an haod ini na mga lugar sa ato samtang wara pa kita karibal sa pag-enjoy nan ini. Pila ka tuig gikan kuman may presyo na o mahal na an pagkaligo ngadto. Pila ka tuig gikan kuman, yaon na mga turista na dili tagaato an maglingaw-lingaw ngadto.